Sunnudagur 23. júní 2019

Frábært veður, hiti allt að 20°C, að mestu skýjað. Það hefur verið heitt alla vikuna, en það komu skúrir í fyrrakvöld, 2,5 mm úrkoma, sem gerði heilmikið, einkum fyrir grasið sem núna sprettur eins og enginn sé morgundagurinn. Sló svolítið, ekki nóg samt.
Gróðursetti 2 glæsitoppa á akrinum, tók burtu dúk sem drap grasið undir sér, búinn að vera þarna í 2 ár og til lítillar prýði. En aðgerðin tókst vel.  Setti annan glæsitoppinn austan við jarðarberjabeðin og hinn framan við og milli eplatrjánna. Nokkur stykki af hlíðaramal fóru með, þetta eru litlar plöntur ennþá, en þær vaxa vel, og ég á svo margar að það er ekkert mál að endurnýja þær ef þær lifa ekki.
Hænurnar eru orðnar svo spakar og skemmtilegar, þær tóku fullan þátt í starfinu með mér.

Áhugasamar hænur róta í moldinni.

Við uppgötvuðum að ein af öspunum í norðurstykkinu var að drepast. Byrjaði fyrir nokkrum vikum á því að toppurinn kól, en dauðinn hélt áfram niður stofninn. 

Öspin, hálfdauður keisari, búin að fella hana. 

Ég sendi fyrirspurn inn á trjáræktarklúbbinn, Þröstur Eysteinsson heldur að hér sé  um að ræða ónafngreindan svepp sem veldur "dieback disease", en Aðalsteinn Sigurgeirsson og Halldór Sverrisson telja að kalið séu frostskemmdir, vorfrostin hafi skemmt vaxtarvefinn. 

   En hvað um það. Við felldum tréð og notuðum greinar og stofn í greinagirðinguna mína. 
 Hún skýlir risagraslauk og eldliljum, búin að setja nokkur stykki þar, þær vaxa ágætlega og eru byrjaðar að fjölga sér, en ekkert ber á blómum ennþá.  Mörg gullregn eru þar í góðu yfirlæti.