Sunnudagur 27. maí 2018

Rigning, hægur vindur og 7-9°C. Við náðum í uppstyttu, eða nærri því og kláruðum að gróðursetja sitkagrenið frá Þöll, 90 plöntur í dag, alls 5xfp40 eða 200 stykki. Þessar síðustu fóru efst í brekkuna upp með læknu norðanverðum. Efst uppi eru nokkur greni frá fyrstu árunum, þau eru farin að vaxa. Bættum einum 10 litlum þar, hin fóru í brekkuna nokkru neðar.
Setti graslauk sem hafði "dagað uppi" í pottum niður á 2 staði, í urð. Kemur í ljós hvort hann spjarar sig. Setti reinfang úr garðinum og kornblóm, vænan hnaus, frá Rúnu í næsta húsi í reitinn við klettinn. Það fer að verða vandræðalegt að þar vill bókstaflega ekkert vaxa.
Inni í gróðurhúsinu fer afar vel um brokkolí og ekki síður rauðrófur, sem hafa tekið vaxtarkipp.

Lyngrósin 'Mikkeli' er farin að sýna blóm.