Sunnudagur 1. maí 2016

Alla helgina hefur verið gott veður, hæg N átt, 6-8°C. Smáskúrir.
Við afköstuðum miklu þessa helgi. Sóttum skít í kerru og settum í 11/2 karm. Svo priklaði ég hnúðkál í 2 karma og brokkólí í 1/2 (ekki alveg fullan). Moldarblandan var 2 fötur af sveppamassa í múrbala af mold, og í þetta sinn bættum við blákorni saman við. Allt í allt voru þetta um 1850 hnúðkál og um 240 brokkólí, þau fóru í litla potta (7x7x6) og í jógúrtdósir. Lok sett yfir og akryldúkur, nú þarf kálið að fá frið í nokkra daga. Ekki er spáð neinni sérstakri hlýnun næstu viku, en trjágróðurinn er allur að taka vel við sér.

Blátoppurinn fyrstur eins og vera ber.

Við klipptum jörvavíðinn norðan meginn við afleggjarann (við hliðið). Þar hefur hann verið að berjast í nokkur ár, og nú náðum við 75 sprotum og stungum þeim umhverfis þá gömlu. Halldór klippti líka 80 græðlinga af viðju og 35 af körfuvíði, hann stakk þeim í mýrina neðan við veginn (nær Gústa og Svenju).

Þá settum við hvítlaukinn í ker, búin áður að setja skít í botninn. Þessi laukur er sá sem Anna Hansen kom með frá Kaupmannahöfn sl. haust, frá Hvidløg og vin. Okkar eigið útsæði er mest allt dautt, það finnst mér mjög sérkennilegt. Við áttum rétt í eitt ker.

Svartþröstur á grein í bakgarðinum við Austurholt.

 Fuglalíf er fjörugt þessa dagana. Þrestirnir eru orðnir heimavanir og hættir að vera með læti við okkur. Rjúpan er á sínum stað, ennþá næstum alhvít. Lóan kvakar, tók fyrst eftir henni um síðustu helgi, en þá er næstum mánuður síðan hún kom til landsins, samkvæmt fréttum.