Gróðursetti nokkrar plöntur í bakkan vestan meginn við akurinn. Þar er svæði sem er að verða mjög gróið og fallegt. Þar eru nokkur birki sem eru búin að vera þarna í nokkur ár. Þau eru beinvaxin og glæsileg. Eitt þeirra hallar aðeins til vesturs og nú setti ég 4 minni í hálfhring utan um það, þá hætti ég etv. að horfa á hallann. Svo setti ég 7 glæsitoppa, 1 álm og 5 heggi í þetta svæði. Heggurinn var í stórum pottum og orðinn mjög flottur, hann blómstraði heilmikið í vor. 1 blæösp fór niður á NV svæðið, uppi á bakkanum. Svo gróðursetti ég 3 stikilsber í brekkuna ofan við hindber og skammt frá blárifsi. Þangað fóru líka 2 silfurreynitré.
Tók eftir því að þó ringt hafi lítilsháttar voru mörg tré orðin mjög þurr. Skvetti vatni á allt, þrestirnir létu öllum illum látum á meðan og ég sleppti "þeirra" hólfi, en þar eru aðallega plöntur sem þola einhvern þurrk.
Pottaði birki sem ég sáði í vor. Það spíraði ekki mjög mikið, fékk rétt rúmlega 100 plöntur. En hins vegar er birki að finna hér og þar í kerjum og pottum, líklegast er okkar eigið fræ farið að fjúka hingað og þangað og sá sér. Sé líka sjálfsáð birki hér og þar um móann.
Halldór hóf vinnu við skjólgirðinguna, staurarnir voru komnir, nú byrjaði hann á klæðningunni.
No comments:
Post a Comment