Fimmtudagur 3. júlí 2014

Þokkalegasta veður í dag, en undanfarna 2 sólarhringa hefur verið vonskuveður með stomi (30 m) og mikilli rigningu. Enn rignir í dag, en minna og snúist hefur í norðanátt.
 Við fórum að Mógilsá í gær og á meðan kerfið vökvaði tókum við upp heilmargar sjálfsánar birkiplöntur í mölinni við gróðurhúsið. Þær settum við niður í dag í auðnina uppi við þjóðveg, lengst í SA. (Ca. 50) Birki, viðja og loðvíðir frá því í fyrra og hittifyrra er í góðum vexti, en ennþá eru plönturnar smáar. Lúpínan breiðir hægt og hægt úr sér og allt svæðið er að fá gróðurþekju sem ekki var til staðar fyrir 6 árum.

 Sýrena sem vex við afleggjarann er með fullt af blómum og þau eru í góðu lagi eftir storminn. Sama verður ekki sagt um rósina 'Hjalta', eina blómið sem var að koma var fokið áður en það náði að opnast alveg. Sýndist það vera einfalt, dökkbleikt.
Hrossakastanían er með dauðan stofn, en það kemur fullt af nýju laufi neðst. Best að leyfa henni að vaxa í friði og sjá hvað verður úr þessu.